Аҕата Спиридон Федорович Бродников, ийэтэ Прасковья Федоровна Старостина Дьуодьалы алааһыгар олорбуттара. Оҕолоро: Николай (ийэлэрин бастакы кэргэниттэн уола), Алексей, Евдокия.
1934сс. Чурапчытааҕы колхозтаах ыччат оскуолатын (ШКМ) бүтэрбитэ.
1934с. Төлөй оскуолатыгар учууталынан анаммыта.
1937с. Төлөй оскуолатыгар үөрэх чааһын сэбиэдиссэйэ.
1939-1942cc. Чурапчытааҕы педагогическай училищаҕа үөрэммитэ.
1942с. бэс ыйын 20 күнүгэр Кыһыл Армия кэккэтигэр ыҥырыллыбыта.
1942-1945 сылларга Аҕа дойдуну көмүскүүр Улуу сэриигэ 1-кы Ударнай Армия кэккэтигэр Арҕааҥҥы фроҥҥа 20-с хайыһар биригээдэтигэр снайперынан, 1117- стрелковай полк автоматчигынан, 307-с аэродромы хааччыйар батальоҥҥа сулууспалаабыта. Старай Русса, Холм, Смоленск аннынааҕы уоттаах кыргыһыыларга кыттыбыта.
1942c. чугас дьоно-сэргэтэ Чурапчы нэһилиэктэрин иһинэн күүс өттүнэн Хоту көһөрүүгэ барбыттара. Аҕатын көмүс уҥуоҕа Сииктэҕэ хаалбыта.
1943с. кулун тутар 19 күнүгэр уҥа атаҕар, онтон балаҕан ыйын 13 күнүгэр икки атаҕар аллараа сүһүөхтэригэр бааһыран гспиталларга эмтэммитэ. Манна сытан “Бааһырыы”диэн хоһоонун суруйбута.
1946с. Арҕааҥҥы фронтан бойобуой мэтээллэрдээх дойдутугар эргиллибитэ.
1946с. Чурапчытааҕы педучилище Базовай оскуолатыгар военрук учууталынан анаммыта.
1946с. хоһоонноро хаһыаттарга, сурунаалларга бэчээттэнэллэр.
1948c. Чурапчы Соловьевтааҕы алын сүһүөх оскуолатыгар саха тылын уонна
литературатын учууталынан үлэлээбитэ.
1949-1952 сс. Дириҥнээҕи детдомҥа үөрэх чааһын сэбиэдиссэйинэн үлэлээбитэ.
1951с. Мария Харлампьевна Луковцева диэн ЧПУ кэнниттэн Дириҥнээҕи детдомҥа пионер баһаатайынан анаммыт кыыстыын холбоһон, ыал буолбуттара.
1952-1953сc. Хатылытааҕы сэттэ кылаастаах оскуолаҕа саха тылын уонна литературатын учууталынан үлэлээбитэ.
1953-1955сс. Дьокуускайга Учительскай институту бүтэрбитэ.
1955-1956 үөрэх сылыгар Хатылытааҕы сэттэ кылаастаах оскуолаҕа саха тылын уонна литературатын учууталынан анаммыта.
1956-1958 cс. ССКП Чурапчы оройуонунааҕы комитетыгар штатнай пропагандиһынан ананан үлэлээбитэ.
1958 c “Социализм суола ”, оройуоннааҕы хаһыатыгар редактор солбуйааччытынан анаммыта.
Ийэлии дьол тыыннаах
Илгэлээх алааhым,
От күөҕэ, мүөт сыттаах,
Оо, бэрдин, сылааhын…
Эн түөскэр, түhэххэр
Элбэхтик мин сыттым,
Дууhабын сүрэххэр
Дуоhуйа сылыттым…
Ил гынар тыыҥҥынан
Иэдэспин уураатын,
Бэл диэтэр тыалгынан
Бэскибин тараатын.
Илгэлээх алааhым
Истиҥник махтаныым,
Алгыспын, талааммын
Аны мин да аныым.
1959с. “Күөх чараҥҥа” диэн бастакы хоһооннорун хомуурунньуга тахсыбыта.
1962с. “Саҥа олох ”, хаһыат редакциятыгар эппиэттээх секретарынан үлэлээбитэ.
1962с. “Кулун туйаҕа” хоһооннорун хомуурунньуга бэчээттэммитэ.
1963- 1966сс . Чурапчы орто оскуолатыгар саха тылын уонна литературатын учууталынан үлэлээбитэ.
1963с. “Сиккиэр ” диэн кинигэтэ тахсыбыта.
1965c. CCРC суруйааччыларын сойууһугар чилиэнинэн киирбитэ.
1966с. “Хочо хоһооно ” бэчээккэ тахсыбыта.
1966 -1978 сс. Чурапчы үлэлиир ыччат киэһээҥҥи орто оскуолатыгар үөрэх
чааһын сэбиэдиссэйинэн, саха тылын уонна литературатын учууталынан
үлэлээбитэ. Бу кэмнэргэ Чурапчы үлэһит дьонун, биллэр спортсменнарын , талааннаах ыччатын туһунан үгүс сырдатар ыстатыйалары, очеркалары суруйбута.
1967с. “ Этигэн хомус” ырыа-хоһоон кинигэтэ тахсыбыта.
1967c – Саха Республикатын оскуолаларын үтүөлээх учуутала бочуоттаах аат иҥэриллибитэ.
1977с. “Хоһооннор ” талыллыбыт айымньыларын хомуурунньуга бэчээттэммитэ.
1978с. бочуоттаах сынньалаҥҥа тахсан, айар үлэнэн утумнаахтык дьарыктаммыта.
1981с. “Куорсуннаах оноҕос” оҕолорго аналлаах хоһооннорун хомуруунньуга тахсыбыта.
1984с. “Кыырайа көт, кынаттаах атым ” орто уонна улахан саастаах оскуола оҕолоругар аналлаах хоһооннорун кинигэтэ тахсыбыта.
1985с. Чурапчы оройуонуттан Аҕа дойду Улуу сэриитин кыттыылаахтарын бөлөхтөрүн салайсан Брест-Минск-Москва бойобуой фронт суолларынан баран кэлбиттэрэ
1986 c. – Саха литературатыгар Эрилик Эристиин аатынан лауреат буолбута.
1987с. олунньу 17 күнүгэр Чурапчы оройуонун Бочуоттаах олохтооҕо аат бэриллибитэ.
1987с. “Айылгы туонабар” хоһооннор, поэмалар хомуурунньуктара кинигэнэн бэчээттэммитэ.
1987с. Чита уобалаһыгар “Забайкальская осень” диэн РСФСР суруйааччыларын сойууһун тэрийиитинэн саха литературатын күннэригэр суруйааччылар делегацияларыгар киирэн кыттыбыта.
1990 с- Москва куоракка РСФСР суруйааччыларын 7-с съеһигэр Саха Сириттэн делегатынан талыллан кыттыыны ылбыта.
1990 с- Москва куоракка Улуу Кыайыы 45 сылыгар аналлаах парадыгар Дьокускай куораттан ветераннар бөлөхтөрүнүүн кыттыбыта, 1-кы Ударнай Армияҕа сулууспалаабыт бойобуой доҕотторунуун көрсөн кэлбитэ.
1993с “Көмүскэ уута ”, “ Арыллыбыт аартык” диэн романнара, өр сыллаах улахан айымньылара, утуу-субуу бэчээттэммиттэрэ
1997с “ Үчүгэйиэн дойду сирэ! ” диэн кинигэтин С.А.Попов- Сэмэн Тумат хомуйан таһааттарбыта. Ол иһигэр “Олоҥхо сирин хотойо” диэн Г.И.Протодъяконов саха биллиилээх снайперын туһунан документальнай сэһэнэ, очеркалара, хоһоонноро киирбиттэрэ.
1998 c. бэс ыйын 25 күнүгэр 81 сааһыгар ыарахан ыарыыттан олохтон туораабыта.
Алексей Спиридонович Бродников
(1917-1998 сс.)
Аҕа дойду Улуу сэриитин Арҕааҥҥы фронун кыттыылааҕа, “Албан аат” 3-с степеннээх, “Аҕа дойду Улуу сэриитэ” 1-кы степеннээх орденнар, бойобуой уонна бэлиэ мэтээллэр кавалердара,
ССРС, РСФСР суруйааччыларын сойууһун чилиэнэ, поэт, прозаик, публицист, Эрилик Эристиин аатынан бириэмийэ лауреата, САССР оскуолаларын үтүөлээх учуутала, Чурапчы оройуонун Бочуоттаах олохтооҕо.
